Избран проектот за новиот административен објект на Општина Карпош

Општина Карпош ќе ја гради новата административна зграда според проектот изработен од архитектонските студија „СКАрС“ и „Архитектри“. Тие се победници на конкурсот распишан од општината на почетокот на оваа година. Новиот објект ќе ги замени дотраените бараки во кои е моментално сместена општинската администрација. Тој ќе се простира на околу 7.500 метри квадратни и ќе има две подземни нивоа, приземје, три ката и подпокрив. Освен просториите за општинските служби објектот ќе вклучува и матична служба која треба да понуди впечатливо церемонијално искуство со оглед на тоа дека ова прашање не е решено ниту на градско ниво. Во внатрешноста на објектот доминантен дел зазема централниот хол околу кој програмски се надоврзуваат општинските служби. Пред главниот влез на објектот пак е предвиден простор кој ќе служи како собиралиште од јавен карактер а приземјето во овој дел е вовлечено. Со изложеноста на кровната фасада кон сончевата јужна страна предвидено е зградата да биде само-одржлива и да се стимулира користењето на алтернативни еколошки извори на енергија.