Скопје 2014

Презентиран проектот „Скопје 2014“

Скопје, 4 февруари (МИА) - Споменици на историски личности од мермер и бронза, фонтани, скулптури  и нови згради на институции, се предвидуваат според проектот „Скопје 2014“ за централното градско подрачје, што денеска беше визуелно претставен, во организација на општина Центар.

Спомениците на Методија Андонов Ченто, Цар Самоил и Јустинијан Први се изработуваат од мермер, а сите останати меѓу кои и на Гоце Делчев, Даме Груев, на Гемиџиите, Св. Кирил и Методија, Св. Климент и Наум, лавовите на мостот „Гоце Делчев“,... ќе бидат во во бронза.

Според деталниот урбанистички план, спроти кафе барот Тренд  и на локацијата до поранешниот Офицерски дом е планирана изградба на хотели. Предвидена е изградба и на православен црковен храм „Св. Константин и Елена“. Локацијата и припаѓа на МПЦ која одлучува кога ќе се реализира нејзината изградбата на црквата.

На плоштадот „Македонија“ ќе има фонтана со споменик на Александар Македонски на Букефал, која ќе почне да се гради откако ќе се дислоцира подземната инсталација, каблите и цевките. Општина Центар за тоа предвидува најмалку два месеца, а целата работата се очекува да заврши во период од околу една година. Предвидено е фонтаната да биде пуштена во употреба без споменикот на Александар Македонски, ќе има шест програми на движење на водата, а навчер и светлосни ефекти во ритамот на различни музички нумери.

Фонтана ќе има и на плоштадот „Карпошово востание“, од спротивната страна на Камениот мост. Фонтаните, пак, кои треба да се поставуваат во Вардар ќе ги изведува компанијата „Ла Моне Моредо“ од Италија, а градежните работи да почнат годинава кога ќе има низок водостој на реката. Водениот столб на фонтаните се очекува да достигне до 30 метри.

Од другата страна на Вардар ќе бидат објектот на стариот театар во Скоје и Музејот на македонската борба, како и зградата во која ќе бидат сместени Уставнот суд, Државниот архив и Археолошкиот музеј. Во нивна близина е предвидена изградба и на објекти за МНР, Агенцијата за електронски комуникации, за Јавното обвинителство и Финансиската полиција. Објектот на новата концертна сала на Македонската филхармонија треба да биде целосно завршен до крајот на 2012.

Пешачкиот мост „Око“ кој води кон зградата на Уставниот суд, Државниот архив и Археолошкиот музеј се предвидува да има 28 склуптури високи по два метра, изработени од бронза. Се очекува изградбата на мостот да продолжи во март или април 2010.

Мостот на уметноста или пешачки мост кој оди кон зградата на Јавното овбинителство и Финансиската полиција е во фаза на конкурс. И на овој мост се предвидени 28 склуптури од бронза, високи два метра симетрично поставени на двете огради. Тука се очекува да се најдат скулптури на Тоше Проески, Браќата Миладиновци, Кочо Рацин, Григор Прличев, Ацо Шопов и други.

Ќе бидат заменети и оградите на мостовите Гоце Делчев, Нов мост и Мостот на револуцијата.

Надградбата на зградата на Парламентот со уште еден кат и поставување куполи се очекува да почне во средината на 2010 година. Со новиот кат се предвидува секој пратеник да добие просторија каде ќе може да врши прием на граѓани.

На плоштадот „Пела“ ќе има порта „Македонија“ или „Македонска борба“ или „Порта на македонска независност“, проект на Министерството за култура.

На местото на поранешната Народна банка на Македонија се предвидува деловен објект. На еден дел, пак, од поранешната стоковна куќа ТИПО или Сити центарот се ппланира монтирање на големи монитори според визуелизацијата.

Ќе се обновуваат и фасадите на зградите во строгиот центар на Скопје за да одговараат на новиот лик на центаралното градско подрачје. Градот наскоро ќе објави конкурс за идејно решение на овој проект, а изградбата се очекува да почне во 2011.

На визулизација на проектот, покрај градоначлникот на општина Центар Владимир Тодоровиќ присуствуваа, министерката за култура Елизабета Канческа-Милевска и градоначлникот на Град Скопје Коце Трајановски.мд/са/14:54

Храмот „св. Константин и Елена“ и споменик на Александар Велики на висока фонтана се дел од проектот „Скопје 2014“, презентиран денеска од Општина Центар.

Целосна промена на центарот на Скопје се предвидува со проектот „Скопје 2014“, презентиран денеска. Изградба на Православен храм, споменик на Александар Велики качен на коњ на висока фонтана се дел од триесетината објекти што со овој проект се предвидени да се изградат.

На кругот на плоштадот Македонија е предвидено изградба на фонтана, на која се планира поставување на споменик на Александар Велики качен на коњ. За поставувањето на споменикот не е даден конкретен рок, иако беше дел од денешната видео презентација.

На локацијата меѓу трговскиот центар „City Gallery“ и ресторанот „Пелистер“ е предвидена изградба на Православна Црква „св.Константин и Елена“. Земјиштето е доделено на МПЦ-ОА и се чека одлука од нив кога ќе започне изградбата на црквата.

Со проектот, на местото на некогашниот Офицерски Дом е предвидена изградба на зграда на градската администрација, во која покрај градоначалникот и администрацијата на Град Скопје, ќе има Сала за венчавање.

Фасадите на постоечките згради што гравитираат околу плоштадот ќе се реновираат и ќе добијат унифициран изглед.

“Имаме чуство дека сме донесени пред ѕид и треба да се произнесеме за што сме: барок, класицизам, неокласицизам, романтизам. Ќе потенцирам - архитектонското дело е лично видување на авторот. Слободно може да истакнам дека сите овие објекти од областа на културата кои се во градба со целокупната организација на внатрешниот простор ги задоволуваат карактеристиките на модерни градби“, изјави министерот за култура, Елизабета Канчевска -  Милевска.

До Плоштадот ќе се стигнува преку портата „Македонија„, што ќе се изгради лево од зградата на ЕВН Македонија.

Со проектот, во центарот на Скопје е предвидено поставување на споменици на Методија Андонов - Ченто, Цар Самоил, Јустинијан Први. До Камениот мост на големи постаменти ќе се најдат спомениците на Гоце Делчев и Даме Груев. Подготовките за нивната изградба започнаа денеска.

„Скопје е главен град во кој треба да се чувствува духот на историјата и културата на Македонија, а тоа најдобро ќе го направиме со оддавање почит на оние кои тоа го создале“, изјави градоначалникот на Општина Центар, Владимир Тодоровиќ.

Во проектот е вметнат и деловниот центар што во моментов се гради на местото на некогашната Народна Банка, а од спротива пред зградата на МЕПСО е предвидена изградба на хотел од познат светски ланец.

Пред зградата на Собранието на Македонија ќе никне споменик на Никола Карев, качен на коњ. Отспротива, во паркот „Жена Борец“ се предвидени споменици на основачите на ВМРО, президиумот на АСНОМ, на паднати херои, и на Бранителите. Зградата на Собранието ќе добие дополнителен кат и купола.

На реката Вардар е предвидена изградба на два нови мостови. Веднаш до Камениот мост ќе никне мостот „Око“ со 28 скулптури, а подоле по течението ќе биде изграден “Мост на уметноста“, на кој ќе се најдат скулптури на Тоше Проески, Браќата Миладиновци, Кочо Рацин, Глигор Прличев, Никола Вапцаров, Ацо Шопов, како и уметници од етничките заедници. Во самата река ќе бидат поставени неколку фонтани.

На левата страна од Вардар е предвидена изградбата на Стариот театар, Музејот на Македонската борба, Македонска филхармонија, Министерство за Надворешни работи, колонада „Независна Македонија“ и зграда во која ќе бидат сместени Уставниот Суд, Државниот Архив и Археолошкиот Музеј, Агенција за електронски комуникации. Голем дел од овие институции досега работеа во изнајмени простории.

Во „Скопје 2014“ е опфатена и ревитализацијата на Скопското Кале. Под него, меѓу мостот Гоце Делчев и Владата е предвидено поставување на два лавови, за кои подготовките за изградба ќе започнат во претстојниот период.

Целокупниот проект е предвидено да се реализира до 2014-та година. /крај/ач