Булевар Србија напредува бавно

Во тек се градежни работи за надградба на булеварот Србија на потегот од крстосницата со булеварите Јане Сандански и Видое Смилевски-Бато до крстосницата со булеварите 3-та Македонска Бригада и 12-та Македонска Бригада. Се градат две дополнителни сообраќајни ленти на источната страна, широки по 3,5 метри. Финалниот слој на асфалт се најавува за напролет. Во рамки на проектот предвидено е и средишно зеленило, осветлување, тротоари и велосипедски патеки. По ист терк ќе се продолжи со надградба и на сегментот во продолжение, до улицата Првомајска, кој е дел од истата фаза на проектот. Оваа фаза стартуваше во јули годинава. Со нејзе е опфатена должина од 1.720 метри и ќе чини околу 2 милиони евра. Изведувач на работите е Мавровоинженеринг.

Комплетирањето на булевар Србија и досега го карактеризираше бавна реализација.  Најавите датираат уште од времето на градоначалникот Пенов. Трифун Костовски за време на својот мандат изгради сегмент што недостасуваше во близина на цементарницата „Усје“ и со тоа ја реализираше првата фаза од проектот. Работите се одвиваа во периодот февруари-септември 2008, а изведувач беше Гранит.

Проектот за надградба на булеварот Србија е изработен во 2005 година. Во текот на надградбата ќе биде направена и реконструкција и проширување крстосниците со Првомајска и 3-та Македонска Бригада. Исто така, паралелно се прават поголеми зафати околу атмосферската канализација, со што се очекува да биде решен хроничниот проблем со поплавување во реонот.